Ketua (2/3)

(Sebelum nei)

Semaung nei, sememon jomo yang bani lemaan teo berkumpul. Lebih dari duo atus keluarga teko tung tampat berkumpul. Dekiit jo yang temban ta’ ruma’ untuk ngenjogo ruma’.

Bana-bana sedih ngenda ta’ muo segaai sememon yang bana-bana payah lakan diki tapi terpaksa nembanan tanak tung segaai lahir ko’ tampat iyang emak ko’ keluarga dedou ngemban. Ruo segaai terbakar lek panas ko’ latih. Teketo lakan luaran yang mara’ piyen sengsara segaai bertahun bertahan bega’ae. Tapi betiru teketo dekiit harapan untuk segaai – sampur ko’ perasaan ngerindu ta’ ruma’. Nangis bana barang jomo to’o yang nyak sedio berpisah ko’ tanak tampat segaai lahir. Segaai sanggup lagi ngemban ta’ tampat diri lakan ko’ mari’ tampat alap tung beruma’ ko’ betonoman. Eko bana dendo nangis gara-gara kan ngembanan denakan segaai anu raai no ngemban.

Ban dela cuba pan bani kan diri segaai ta’ bunda’ ko’ moyo soro segaai, – Jadi, kam kui ka nyak teko mangan ta’ tanak tu ko’ lum ta’ pondok diki’ tu? – Sebana nei segaai kui mo’o sememon barang ko’ pondok ae ko’ segaai mun buli.

Telake soro ingor ko’ moyo soro segaai ta’ diom setiap kumpulan. Pedelaan dendo somo jo. ban peranak ingor ta’ diom tung ngangkat segaai. Barang binatang pan nyak dangei selesa. Nyak pan eko sapi, dekauk mae’ae, dekauk anak nei mitu, ko’ ruun dekauk kuda diki’ bana badan nei tapi tekook nei oyo ko’ betis nei oyo bana. Posok segaai jo sememon ae ko’ permaidani ko’ dua karung ta’ jata pek, sampai kok beraai jo binatang ae payah lemaan, gara-gara kebuatan barang. Tapi teko pan lemaan pelaan-pelaan sambil melua’ soro kepayaan. Yang lain nook keldai ngangkat barang; peranak narik owa makai tali. Bara-bara, ngera, ngeling, nguma, kepedian – sememon no mae’ae. Keldai ae pan dangai kali no ingor. Tapi ketua ae nyak betutur iyen-iyen, masam ko’ ngaiko urusan nei langsung. Bana-bana sediri jomo tu!

Iyo sanyam jo nunduk tekook nei. Kadang ngeluda’ ta’ tanak; ae jo. Tapi gara-gara gaya nei sediri bana, sememon jomo ingin bana ta’ iyo sampai sanggup segaai buat iyen-iyen jo untuk nei. Bara-bara ta’ diak tu buli tekale:

– Kitei patut nei sanang atei rai temu tei dela masam ko’ iyo tu. Mun kitei nyak bei nemu iyo, nyak terati iyan kan jadi! Mesti sengsara no tei. Iyo tu pintar, mara’ bana aku! Iyo sanyam jo. Nyak bei betutur depatah ayat lagi! -bara endangan sambal ngenda’ ta’ ketua segaai ko’ pandangan yang hormat ko’ bangga.

– Iyen bara nei? Siyen betutur eko ngaiko mikir bana. Jomo pintar, bana-bana! Iyo ngenda jo, nyak betutur iyen-iyen, -tambah endangan ae, ko’ iyo pan ngenda ta’ ketua ae ko’ pandangan kagum ta’ ketua ae.

– Ngaiko’ sanang jadi ketua untuk eko jomo! Iyo mikir bana sebab iyo ruun tanggungjawab oyo, – bara’ endangan ae lagi.

Masa nei teko no untuk lemaan. Segaai ngagad kajap, ngenda mun ruun lagi jomo sediri kan nuut ta’ segaai, tapi nyak ruun jomo teko, jadi segaai nyak teko ngagad lagi.

– Jadi lemaan no kitei? – segaai tilou ta’ ketua ae.

Ketua gaai mantou tapi nyak betutur iyen-iyen.

Barang dela anu bani sememon ngerumun iyo supaya nyak ruun benda nyak ingin jadi.

Ketua ae, berkerut lendo’ nei, ngenda’ media’, ngayun tongkat nei ta’ bunda sambil lemaan ko’ penok maruah. Sememon jomo lemaan ta’ bukut nei sambil mara’ “ Luum pemimpin kami!“ Iyo lemaan lagi dekiit sampai kan labu’ ta’ pagar ta’ bunda balai raya kampung ae. Mae’ae iyo beranti; jadi segaai pan beranti. Ketua ae undur dekiit ta’ bukut sambil ngetuk tongkat nei ta’ pagar ae.

– Iyen kan benuat? – tilou segaai.

– Sanyam jo yo.

– Iyen patut benuat tu? Ngerubuh pagar! Ae kan benuat! Nyak kam ngenda’ ka iyen bara’ nei lek ngatuk tongkat nei mae’ae? -Ngera gaai anu sikot ko’ ketua ae.

– Ruun  pagar! Ruun pagar! – Ngera ban peranak sambil nunjuk pagar ta’ bukut segaai.

– Sanyam kam, peranak!

– Iyen rei jadi tu? – sambil nanda salib ta’ dada segaai.

– Nya’ depatah pan tenuturan! Iyo ngerati iyen kan benuat. Rubuuin pagar ae!
Dalam sekelip mata, pagar ae rubuh masam nyak beei pengen pagar ae mae’ae.

Limpasan segaai pagar ae.

Baau jo segaai ngelengka’ datus langkah, raai no pan temu ketua ae semak duri oyo lapas ae beranti. Ko’ kepayaan iyo teko peluak tarus ngetuk tongkat nei ta’ sememon arah. Nyak endangan pan bergerak.

– Iyen masalah nei betiru? – Tilou barang jomo.

– Lesaan bi semak duri ae! – ngera jomo sikot ta’ ketua ae.

– Ruun laan, ta’ bukut semak duri ae! Ae no ae! – ngera barang peranak ko’ jomo ta’ bukut.

– Mitu laan ae! Mitu laan ae! – bara’ jomo ta’ sikot ketua ae, nuut ko’ soro manas. -Piyen pan jomo pisok ngerati pinggo yo kan mo’o kitei? Ngaiko’ sememon buli mara’ iyen kan benuat. Ketua ngerati iyen laan paling alap tung lemaan ko’ paling lekas. Lesaan bi semak duri tu!

Tarus lesaan gaai laan ae.

– Aduh, – ling jomo anu raai teruak duri ta’ tangan nei ko’ jomo yang teruak dahan berry irom.

– Denakan, kam mesti mengkerso pedih dekiit ta’ diom bikan kolek engkerso kemenangan – bara jomo yang paling bani atara sememon mae’ae.

Lapas berabis segaai ngelesa semak, tekolek segaai no lemaan.

Lapas lemaan teo dekiit, jumpo segaai lagi pokok bungo pial. Itu pan nelesaan. Lapas ae segaai lemaan lagi.

Hari pertama ae dekiit jo temu segaai tanak abis eko bana masalah perlu segaai nyelesain. Lain lagi dekiit jo makanan, sebab ruun mo’o ruti ko dekiit keju jo, debagi mangan ruti jo tung messo betong. Debagi nyak mangan langsung. Nasib no musim buak waktu ae, jadi ruun pan pokok buak tenemu.

Jadi, biarpan hari pertama baru dekiit rintangan segaai teruak, tapi latih bana segaai. Nyak ruun perkara bahaya ko’ nyak alap jadi.  Andang mun  kitei ingin ngelakuin benda penting, barang begitu tu bara’ jomo leceh jo: duri posok ta’ moto gibang endangan dendo, lapas ae tutup nei makei tuala basek, endangan peranak madas betis nei ko’ kayu jadi pingka’-pingka’ yo lemaan, endangan dela to’o labuk ta’ semak pokok berry irom  ko’ buat buku lali nei selauuh, lapas benanan bawang kenisar ta’ buku lali nei, dela ae ko’ bani nei naan pedih ko’ makei tongkat, pingka’-pingka’ lemaan ta’ bukut ketua ae. (Bara segaai, ruun dangei jomo mara’ jomo to’o ae nipu jo pasal buku lali nei gara-gara nyak sabar kan molek.) Dekiit bana jomo nyak ruun teruak duri ta’ tangan ko’ muo. Ban pedelaan nahan pedih jo tapi ban pedendoan meling, ngendolek ko’ ingor setiap masa ko’ ban peranak pan macam bioso no nangis, sebab segaai nyak ngerati ko’ faham lagi sememon susah payah akan kole hasil lumayan ko’ alap.

Paling samang atei segaai bila nyak ruun iyen-iyen jadi ta’ ketua segaai. Tapi mun segaai mara’ bana, sebana nei ketua ae tua’ lindung lek segaai sememon, tapi bana pan dela ae tekole nasib alap. Malam pertama ae, sememon sembeang ko’ berterimo kasih ta’ Tuhan yang laan hari ae alap-alap jo. Nyak dekiit pan masalah teruak ta’ ketua. Tiba-tiba ruun endangan dela ko’ muo nei teruak dahan pokok berry irom, tapi nyak yo padul.

– Denakan, – bara nei. – Terimo kasih kitei ta’ Tuhan sebab teko harungi hari pertama tei dembangi tu. Laan nyak sanang, tapi kitei mesti bertahan sebab terati tei laan payah tu no mo’o kitei kesanangan. Semoga Tuhan akan sentiasa ngelindungi ketua kitei lakan bahaya supaya iyo tarus teko mo’o ko’ ngetuai kitei.

– Semaung dembila’ lagi motoku rungei! – bara’ endangan dendo ae ko’ nada ngendolek.

– Aduh, betis ku! – dela to’o ae besoro gara-gara telake nei dendo ae ngendolek.

Ban peranak pan tarus ingor ko’ nangis, payah bana iyang segaai no’ gai sanyam supaya telake segaai iyen benara’.

– Bana, dembila’ lagi moto no rungei kang, -besoro ya ngendole, – mengkali duo-duo moto no rungei! Ngaiko’ masalah oyo mun ko pisok gara-gara mari’ tampat temban alap. Patut nei malu ko ta’ diri no! Nyak pikiran no nasib ban anak-anak no? Baya’ nei kitei sengsara betiru! Iyen pan beza nei? Dembila’ moto? Untuk iyen moto ae mun ruun jomo sediri ngenjogo ko’ mo’o kitei mari’ tempat temban alap? Patut ka kitei nembanan iyen usaha tei tu demi mikiran moto ko’ betis jomo to’o ae?

– Ngarang jo yo ae! Jomo to’o ae ngarang! Pura-pura jo yo ae supaya teko yo molek, – telake soro lakan sememon tampat.

– Denakan, siyen nyak kui nerusin ko’ nuut, – bara dela ae, – baya no yo molek lakan ingor ko’ mempengaruh kitei. Mun aku, tuut ku jo ketua tei tu pinggo-pinggo selagi lum!

– Kami kan nuut! Kami nuut jo pingo pan ogo no selagi kami lum!

Ketua ae sanyam jo.

Sememon jomo ngenda’ ta’ iyo sambal sebara’:

– Teo bana pikiran nei!

– Dela pintar!

–  Enda’ no do’ lendo nei!

– Balik-balik berkerut lendonei!

­– Bana!

– Jomo bani tu! Ae teketo segaai ta’ dela ae.

– Bara ku lagi ah! Pagar, duri ko’ poon – sememon raai no limpasan nei. Ko’ muo sedih iyo ngetuk tongkat nei, nyak betutur iyen-iyen, ko jo perlu neka iyen pikiran nei.

(Seterus nei)