Ketua (1/3)

– Denakan ko’ seek, rai no tekale ku iyen bara’ nu sememon, jadi betiru kam lagi mengkale iyen tuturan ku ah. Iyen bara’ tei nyak ruun tekole’ tei mun kitei kakal temban mitu. Nyak ruun iyen-iyen kole’ tomo’ mitu mun tanah ko’ batu jo, mun uran pan nyak tomo’ iyen lagi mun laat panas. Sampai semberen kitei kan begitu tu? Ban sapi kan matei nyak ruun kakanan, nyak betah, kitei ko’ ban peranak lagi matei kebulur nyak ruun kan kenakan. Kitei mesti mari’ laan sediri yang lebih alap ko’ lagi posok akal. Bara’ ku alap lagi kitei nembanantampat tu, ko’ mari’ tampat lagi alap sebab nyak buli no kitei luum begitu tu.

Jadi ruun jomo lakan tampat nyak subur betutur ko’ soro lama ta’ diom mesyuarat. Bara’ ku, nyak kitei padul minggo ko’ semberen ae. Yang penting iyo jadi dedo’ou ta’ laat teo ko’ sukup no ae. Tarus tarang aku, tereso ku aku buat cerita tu, tapi dekiit dekiit aku bangun lakan khayalan tu. Betiru besoyo bana aku, aku kole’ ngait iyen bana bana jadi ko’ iyen buli jadi ta’ enggo-enggo tampat ko’ aku nyak buat buat serita ae.

Sememon kale ko’ muo pucat, nyak semangat ko’ tangan segaai ngentan tali pinggang, seakan ko’ semangat kale tuturan ae. Endangan-endangan tebayang segaai ta’ tanak alap enggo mun nonom tekole’ hasil eko ko’ alap-alap.

– Bana bara’ nei! – Bara’ soro-soro jomo latih ta’ mae’ae.

– Tampat tu si…kot ka? – Tekale soro diki’ lakan tepi.

– Denakan! – dekauk lagi soro daras. – Kitei mesti nuut iyen bera gei lekas, kitei nyak buli begitu no tu. Sememon iyen kitei buat nyak ngam no, daa no kitei tarus begitu. Latih bana no kitei begitu tu, sia-sia jo mun raai no nonom, raai teko bba’ abis sememon tonoman beno’o lek bba’, temban batu jo lagi. Patut ka kitei ngagad mitu, lakan sensaung smpai songom, lengantu, nyak ruun baju ko’ selipar? Kitei mesti peluak mari’ tanak alap, mun kitei nonom ruun hasil alap.

– Lemaan no! Lemaan no lekas, tampat tu nyak ngam tung temban no!

Soro diki’ telake sambil gaai leman, nyak mikir pingo kan ngogo.

-Ngagad, denakan! Pinggo kam? – Jomo pertama bersoro – Memang kitei perlu lemaan, tapi ngaiko’ begitu. Kitei perlu ngerati pingo kan ngogo. Amun nyak, lagi teruk kitei kang, ngaiko nyelamat diri tei kang. Bara ku kitei mari’ dok ketua yang buli kitei kale tuturan nei ko’ ketua yang buli nunjuk laan nei.

– Mari kitei menek! Menek endangan betiru, – tekale lakan semomon tampat.

Baru betiru sememon betutur ko’ segagut boa’. Nyak ruun mengkale iyen benara’. Segaai mula no pesa’-pesa’ nuut kumpulan masing-masing. Segaai cuba mara’ ta jomo sikot segaai guna tangan, narik baju ko’ nook sanyam dalam masa somo. Lapas ae segaai bincang balik, masih betutur.

– Denakan! – Tiba-tiba telake soro oyo bana ta’ diom kumpulan anu betutur ae. – Kitei nyak tekole iyem-iyen kata putus amun begitu. Sememon jomo betutur mitu, nyak ruun mengkale. Mari no kitei mari’ ketua! Siyen antara kitei buli penilih? Siyen bei lemaan teo anu ngerati lemaan? Kitei sememon ngerati jomo kitei-kitei mitu, tapi nyak buli sap aku milih diriku atau siyen-siyen antara kitei mitu untuk jadi ketua kitei ko’ anak-anak tei. Jadi, bara’ bi do’ ta’ aku siyen jomo luar yang nengkook ta’ diak rimbun ta’ hujung jalan ae lakan sensaung lagi?

Sanyam sememon. Sememon ngenda’ ta’ dela ae lakan jata media’.

Jomo luar tu, masih mura’ pan, muo nei sedih tertutup lek buutekook nei anu langkau ae, lengkook sanyam jo, lakan ko’ mikir bana sambil ngentan tongkat nei.

– Dilou teketo ku dela somo tu ko’ peranak. Segai seentan tangan lemaan ta’ laan. Dilou peranak ae medus tapi dela ae kakal mitu.

– Denakan! Daa no kitei segagut gara-gara salah faham tu, buang masa jo. Siyen pan yo, yo raai no teko lakan tampat teo ko’ iyo mesti ngerati laan paling sikot ko’ alap untuk mo’o kitei. Penendaan ku, dela tu iyo mesti pintar abis lakan sinik sanyam jo yo lengkook sambil mikir. Siyen-siyen pan mesti raai no teko’ ta’ kite ikan betutur ko’ kitei, tapi iyo nyak. Lengkook sanyam jo yo mae’ae.

– Andang dela ae sanyam jo lengkook, abis iyo mikir.Bara’ ku pintar bana jomo tu, – bara’ segaai sememon sambal ngenda’ ta’ dela ae. Dekauk-dekauk ngeto ko’ ngenda-ngenda’ bukti kepintaran nei.

Nyak eko serita lagi, sega’ai dekauk soro nook dela ae jadi ketua segaai – Bara gai Tuhan ngendedek dela ae untuk ngerubah keadaan. Dela ae mesti jadi ketua segaai, ketua yang segaai akan kale iyen jo tuturan nei, nyak akan mantah.

Segaai nook sepuuh dela lakan kumpulan segaai  pan balik, untuk ngogo tak dela ae mara’ iyen kuie segaai. Itu tu untuk dela ae ngenda’ piyen ingin bana segaai nook dela ae jadi ketua segaai.

Jadi sememon sepuuh-sepuuh dela ae ngogo ko’ maku tulung alap-alap. Engdangan lakan segaai mara’ iyen jadi ta’ mae’ae. Bertahun tana’ nyak alap ko’ sememon misteri teketo segaai. Bara nei.

– Keadaan tu maksa kami untuk nembanan ruma’ ko’ tana’ ko’ pelua’ demi mari’ tampat temban alap. Ngam-ngam pan kami nemu kata sepakat, penendaan kami Tuhan rai mengketo kami, ngirim kau – ta’ kami, dela alap lagi pintar – ko’ kau buli mo’o kami peluak lakan masalah tu. Ta’ bundak sememon jomo mitu, kami kui ko jadi ketua kami.Pinggo-pinggo pan ko kan ngogo, kami nuut. Kau ngerati laan ae ko’ mesti ko bei lahir lakan keluarga ko’ tampat lagi alap lakan kami. Kami akan kale iyen jo tuturan nu. Piyen bara nu? Kui ko jadi ketua kami? Ketua yang buli kami ngarap nyawa kami?

Sepanjang segaai betutur nook iyo jadi ketua segaai, dela ae nyak ngangkat tekook nei walau sekajap, iyo masih tunduk bida’ ko’ segaai ngeto ito lakan sini’. Tundukan nei tekook nei, berkerut dahi nei, ko’ iyo nyak betutur iyen-iyen. Iyo ngangkat ko’ letak tungkat nei dekiit demi dekiit ta’ tanak ko’-mikir. Bila segaai habis betutur no, baru nei yo muka boak nei dekiit sambil betutur:

– Bah!

– Buli kami nuut ko mari’ tampat lagi alap?

– Bah buli! – bara nei sambal nunduk tekook nei.

Bersyukur bana segaai ta’ dela ae tapi depata’ pan dela ae nya’ besoro.

Sememon segaai sepuuh-sepuuh mara’ ta’ sememon jomo mae’ae yang segaai teko buat dela ae jadi ketua segaai, nambah lagi tuturan yang segaai baru ngenda kepintaran dela tu betiru.

– Iyo nyak betutur iyen-iyen atau ngangkat tekook nei langsung waktu segaai betutur ko’ iyo. Nengkook sanyam jo yo. Bega’ae eko tuturan segaai ta’ yo, empat patah jo tampung nei.

– Bana-bana jomo pintar! – segaai sanang atei bana sampai riuh bana segaai mara’ Tuhan rai ngirim segaai malaikat lakan syurga utuk nyelamat segaai. Sememon yakin bana buli kolek kehidupan lagi alap mun iyo jadi ketua ko’ jomo lain nyak buli malui yo. Jadi segaai mutus, semaung nei awal laat gaai lemaan.

(Seterus nei)